IBYO WAMENYA KU HANTU NDANGAMURAGE MU KARERE KA NYANZA.

 

Akarere ka Nyanza gaherereye mu Ntara y’ Amajyapfo, ku birometero 90.7 uvuye i Kigali unyuze mu muhanda RN1. Ni urugendo rusaga amasaha 2 mu modoka. Aka karere kabumbatiye amateka menshi yiganjemo ayo hambere. Kuva mu mpera z’ ikinyejana cya cumi n’ icyenda, Akarere ka Nyanza kafashwe nk’umujyi n’umurwa w’abami kuko hatuwe n’abami basaga 4. Abo ni Umwami Kigeli IV Rwabugiri wari utuye ku misozi ya Mwima na Mushirarungu, Umwami Yuhi IV Musinga watuye Mwima na Gakenyeri, Mutara III Rudahigwa watuye mu Rukali ndetse n’ Umwami Kigeli V Ndahindurwa watuye i Busasamana.

Aka karere gafatwa nk’ agace ndangamuco kuko usibye kugira Ingoro ndangamurage ebyiri n’ Umusezero, unahasanga ahantu henshi Ndangamurage hakwiye gusurishwa ba mukerarugendo.

 

Duhereye ku Bigega, ibirometero 95.8 uvuye i Kigali, uhasanga ibigega byubakishijwe n’ Umwami Mutara III Rudahigwa mu 1946 nyuma y’ inzara ya Ruzagayura (1943-1944), byubatswe hagamijwe guteganyiriza ibihe by’ amage bishobora gutera igihugu cy’ u Rwanda. Muri icyo gihe, abaturage nibo bazanaga imyaka yo guhunika igizwe ahanini n’ ibishyimbo n’ amasaka igakusanywa n’abatware nabo bakayishyikiriza abacungaga ibyo bigega.Nyuma y’ itanga ry’ Umwami Mutara III Rudahigwa, ibigega byakoreshejwe mu icuruzwa ry’ imyaka itandukanye kugera 1994. Kuva mu 2000, ibi bigega bicungwa na Minisiteri y’ Ubuhinzi n’Ubworozi bikaba  bigihunikwamo imyaka.

Hafi y’ Ingoro y’ Umwami, ahazwi nko mu Rukari mu kilometero 1, uhasanga                Umusezero w’ i Mwima. Ku musozi wa Mwima witegeye Mushirarungu hatabarijwe Umwami Mutara III Rudahigwa watanze tariki ya 25/07/1959, agatabazwa tariki  ya 28/07/1959. Umwami Kigeli V Ndahindurwa watanze tariki ya 16/10/2016 atabazwa tariki ya 15/01/2017. Umwamikazi Rosalie Gicanda wishwe muri Jenoside yakorewe abatutsi  tariki ya 20/04/1994 ashyingurwa mu cyubahiro tariki ya 20/04/1995.

Uvuye mu Rukari werekeza i Mutende uhasanga Amariba ya Mutende.                                Aya yafukuwe ku ngoma y’ Umwami Mutara III Rudahigwa, aho inyambo z’ umwami ndetse n’ inka z’ abaturage ziturutse imihanda yose zashokaga. Aha habaga amazi arimo umunyu, bityo inka zayanywaga zimaga vuba, izindi zikanagira umukamo ushimishije.

Icyuzi cya Nyamagana cyafukujwe n’ Umwami Mutara III Rudahigwa afatanyije n’ Agronome w’ umubirigi witwaga Dubois, nyuma y’ inzara ya Ruzagayura hagati y’ umwaka wa 1943 na 1944 yari yarayogoje igihugu. Mu kugicukura umwami yari agamije kuhira imyaka no gutangira ubworozi bw’amafi, mu rwego rwo guhashya imirire mibi mu banyarwanda no kwirinda ibindi byorezo by’ inzara byashoboraga gutera.

Iki cyuzi cyahawe izina rya Yorodani y’ i Nyanza.

Gakenyeri kwa Musinga na ho habumbatiye amateka agomba gusigasirwa no kumenyekanishwa: Aha hari urugo rw’ umwami Yuhi V Musinga n’ Umugabekazi Nyirayuhi V Kanjogera, bahatuye ahagana mu 1899. Kuva icyo gihe ,Nyanza yabaye umurwa mukuru w’ ubwami kugeza mu 1962 ubwo ingoma ya cyami yakurwagaho. Mbere ya Gakenyeri uyu mwami yagiye atura ahandi akagenda yimuka. Ubu aha Gakenyeri hari ikigabiro kinini bivugwako cyari ku irembo ry’Umwami Musinga.

Mututu: Aha hantu ndangamurage hubatswe n’ Umwami Mutara III Rudahigwa ahakorera ubworozi bwa kijyambere hagati ya 1948 na 1949. Yari ahafite inka z’ inkuku 60 zitwaga “Ingeri” zikabamo imfizi yitwaga “Ruhugafu.”

Mu kuhororera izi nka, Umwami Rudahigwa yari agambiriye gutanga urugero ku bworozi bwa kijyambere, aho yifuzaga ko abanyarwanda bareka ubworozi bwa gakondo.

Ikimana cya Nyiranzage: giherereye mu Murenge wa mukingo hafi y’umuhanda wa kaburimbo. Nyiranzage yari umugore wa Marara, Marara uwo akaba yaratwaraga Mukingo ku ngoma ya Yuhi IV Gahindiro, Marara waje gusimburwa ku butware n’ umuhungu we Nyirimigabo. Mu bihe byo hambere, iki Kimana cyarubahwaga cyane, kigakorerwaho imigenzo n’imihango. Kugeza mu bihe bya vuba, hari imigenzo gakondo yari ikihakorerwaga.

Ikimana cya Munana: Munana yari umuhungu wa Gihana wafatwaga nk’ intwari. Uyu yabyawe n’ Umwami Cyirima II Rujugira n’ umwamikazi Nyirayuhi IV Nyiratunga.

Munana wari waravukanye ubumuga, akiri muto yatereranywe na bamwe bo mu muryango we aho umuvandimwe we Yuhi IV Gahindiro yimiye akaba umwami, Munana yagororewe imisozi hamwe n’ ishyo ry’ inka. Nanubu aho hantu Munana yatuye uhabwirwa n’ ibiti biri by’imivumu by’icyo gihe.

Kuri ubu Ikigo cy’ Ingoro z’Igihugu z’Umurage w’ u Rwanda ku bufatanye n’ Akarere ka Nyanza hamwe n’ Ikigo cy’ Igihugu cy’Iterambere RDB bari gutegura gahunda yo gutunganya aha hantu kimwe n’ahandi hafite amateka hagamijwe gusigasira amateka no guteza imbere ubukerarugendo bushingiye ku muco mu rwego rwo kuhasurisha ba mukerarugendo, bityo hakinjiriza amafaranga igihugu cyacu.

 

 Byegeranyijwe n’

Ishami ryo guteza imbere ubukerarugendo bushingiye ku Muco.

Ikigo cy’Ingoro z’Igihugu z’Umurage w’ u Rwanda.